Temp Liber
SuperTuxKart: giügà gratis e divertiss
Vüna di növ che revarden l'infurmatiga di ültem agn a l'è la dispunibilità de prugrama gratis a dispusizion de tücc e de modifega libera (open). Questa revolüzion, ciamada del "software liber", la gh'ha el sò rapresentant püssee cugnussüü in del sistema uperativ Linux e i sò prugrama a dispusizion. El setur di giögh a l'è però bel viscur anca lü tant che'l gh'è giamò un bel nümer de giögh de tücc i gener cumpagn de quij prufessiunaj.
In del grüp di clone ispiraa ai alter curispetiv cumerciaj, al gh'è el SuperTuxKart. Cumpagn del SuperMario Kart che'l ciapa i persunagg di stori del Super Mario e ja fa cur in di circuit del go-kart, chì a hinn i mascotte di prugrama di software liber, a partì del Tux che l'è el simbul de Linux, a fà i gar per ving i gran premi. El sistema de giögh a l'è cumpagn del capulauu de la Nintendo: un sistema de guida arcade senza tanta 'tenziun al realism, circuit impienii de cürv ambientaa in post inimaginabil, bonus de ciapù in gir e curidur (fina a 7 cuntrulaa del cumpiüter) che se fan minga prublema a rüzà i aversari.
Somejanza 1: Vün di prim circuit
Per prima roba vardem i modalità de giögh. Per fà un poo de pratiga pröum i prim circuit e'l prim gran premi dispunibij. Se fem fadiga a l'è mej scuminciaa cunt el nivel püssee bass di trì a dispusizion e scernì poch aversari (de vün a set). l principi i pist dispunibel a hinn poch e se poden liberà dumà cun la mudalità "sfida". I sfid poden vess d'un poo de sort, cumè fà el record in d'una pista, ving una gara in mudalità "follow de leader" (=stagh adree al prim), induè che se ving se se riess a stagh adree al prim de la cursa per püssee temp pussibel ma senza però süperal, o ving e ciapà püssee bonus pussibij. A la fin de la fera se riessen a desblucà asquas 20 circuit e 4 gran premi. Ultra a quest al sit se pö descargà un add-on per giuntagh alter ses circuit e un quaj alter curidur.
Cumpagn del MarioKart, chì i curidur poden ciapà in gir di bonus spetacular e putent: i turbo per acelerà la machina (ma che la fan sbandà) o di bonus a surpresa che poden vess bal esplusiv, bomb telecumandaa, la cica che la fà andà adasi quij che ghe van sura, un bonus de aceleraziun e una corda per tacass ai alter machinn che van püssee svelt e fass traspurtà. Insema ai bonus gh'è anca in gir i màlus a furma de banana che fan andà adasi la machina. A l'è dunca fundamental schivà i màlus e ciapà i bonus per rivà prim. 'Tenziun però che i noster aversari staran minga cunt i man in man: a hinn propi bun a tegnì la pista e hinn propi materiaj e daran di culp a la nostra machina per fala sbandà.
 Somejanza 2: Mudalità per dü giügadur |
Se sii inscì bun de ving tücc i gar e gran premi, alura pudii sfidà ai voster amis. Cume in del MarioKart a l'è prubabilment questa la mudalità de giögh principala: l'impurtant a l'è vegh un joystick o cuntentass de giügà in dü cun l'istessa tastera. El giögh 'l suporta fina a 4 giügadur e'l spartiss el scherm in toch cumpagn per fà vidè la gara. |
El giögh a l'è dispunibel per el Linux, per Windows e Mac OS X. Per tral giò, el sit a l'è http://supertuxkart.sourceforge.net/
Bon divertiment!
Dàvid Giuann Apollonio