Parlèm de la vostra müsega: qual hinn i voster ispirazion?
Müsicalment a sa ispirom a vari grüp dal gener Punk rock, dai Toten Hosen, che l’è un grüp germanich, ai NOFX e SUM 41 che i è American, e a un quai alter grüp dal gener. Per chel che riguarda i tesct, a podom dì che l’è tüta linfa nossa, con temi atuai e sctoriel noss, che i podress capità a tücc.

Cüntii sü ai noster letur cum'a l'è un voster cuncert
I noss concert i è principalment ‘na fescta, i è mia tant un spettacol da virtuos dala ghitara o dal bass, ma i è un’ esibizion da grüp, induvè ognün da nüm u dà al massim da sé sctess per i scpetador che i è present. L’ambient che sa crea l’è sempru positif, moltu popolar e alegru.

Al mument quanti copi avii vendüü del voster CD?
A sem a quota 300 circa, che per al noss piccol Tisín l’è ‘na bela cifra. Anca tenenda cünt che l’è al noss prim lavor, e che al mercat dal disco al dì d’incö l’è in crisi, per la cronaca a n’emm sctampat 500 copi, quindi a semm oltre la metà!

Chi l'è che l'avüü l'idea de cantà in ticines? 'Se'l vör dì per vialter el cantà in ticines?/lengua regiunala? 'Sa l'è che pensen i gent che vegnen ai voster cuncert?
L’idea i ga l’ha avüda Josh al Cantant e Dodi Al ghitariscta. Per nüm cantà in dialet l’è moltu important, per fass capì mei da la gent, e anca per riüssì a esprimass mej, ma principalment per tegnì viva chesta nossa bela lingua che l’è dree a scparì pian pian, e a trövom che l’è un gran pecaat! La gent che ga scolta l’è moltu contenta da chescto, e a devom dì che propi al fat che a cantom in dialet u atira amò püssee gent che se a canteressom in Inglees o alter.

Cugnussii alter grüp che canten in Ticines/Insübrich?
-Certo, per citann un quaidün, sicürament al Davide van de Sfroos, i Vad vuc, i Vomitors.

Cum'a l'è vist un grüp che'l canta in Ticines in Cantun Tisín?
A podom dì che l’è visct da bon öcc anca da chi che parla mia al dialet, i tröva comunque ‘na simpatia per quel che a fem, e anca la radio e la television i ga apprezza e ‘na quai volta i ga ciama a sonà.

'Sa l'è ch'en pensii di alter grüp che canten in Insübrich ma che hinn de l'altra part de la fruntera?
Segonda nüm l’è ‘na bela roba che i esistan, che come nüm i porta avanti al noss dialett, e i tegn viva la tradizion. Percè se nessün u canta pü in dialet, la gent la sa identificherà domà in di canzon in Italian, e al dialet la savrà pü com’u s’parla, invece col sentì i canzon in dialet, la sa interesa magari püssee da cos’l’è al significat di vari terminn, quindi sa crea già ‘na specie da apprendiment.

Avii di pruget per el fütür?
Da progett a ga n’em tant, al püssee gross l’è al noss prossim cd, a comincerem a lavoràgh probabilment in esctaat, a gh’em diversi canzon nöf. A vörom sonaa al püssee possibil la prossima esctaat, partecipà a tanti open air. U ga dispiaseressa mia nanca vegnì a sonà dai voss part, magari chescta intervista la ga darà ‘na man, chissà…al 21 da marz a sem in television, sü tsi 1 , dopu i 21.00, a cantom un toch in diretta. A ciapom l’ocasion per salüdà tüta la gent da l’Insübria, e a va rigordom al noss sit, per qualsiasi informazion, che l’è www.piace.ch, ciao a tücc!